«Балаларға базарлық!» кітап сыйлау шарасы

«Бұл халық игілігі» қайырымдылық акциясы аясындағы «Балаларға базарлық!» кітап сыйлау шарасы

⠀

Халықтың рухани байлығын дамытып, кітапхананың кітап қорын әдебиеттермен толықтыру, жалпыұлттық құндылықты әрбір жастың бойына сіңіру, оқырман мен кітапхана байланысын одан әрі нығайту мақсатында Тәуелсіздіктің 30 жылдығы және «2021 жыл – Балалар мен жасөспірімдердің кітап оқуын қолдау жылына» орай «Бұл халық игілігі!» қайырымдылық акциясын ілгерілету мақсатында кітапханада «Балаларға базарлық!» кітап сыйлау шарасы ұйымдастырылды.

Іс-шараға аудандық балалар кітапханалары Zoom платформа арқылы онлайн түрде қатысты.

Кітап мәртебесін көтеру мен жастарға кітап оқуды насихаттау үшін ұйымдастырылған шараға екі жүзге жуық кітап сыйға тартылды. Жамбыл облысы Ардагерлер кеңесінің төрағасы Солтыбаев Еркімбек Бейсембекұлы бастаған бір топ құрметті қоғам қайраткерлері – Есіркепов Оңласын Қарабайұлы, Әділова Раушан, Төлебаев Арқабек Жамбыл облысы Ардагерлер кеңесінің қолдауымен басылған «Ардагерлері ақылман Әулиеата», «Қазақтың Шерағасы» 5 томдық жинақ, Қазақстан Республикасының Ардагерлер кеңесінің 20 жылдығына орай шыққан «Плечом к плечу в одном строю» кітаптарын тарту етті.

⠀

Сондай-ақ экономика ғылымдарының кандидаты, қоғам қайраткері, Жамбыл облысының Құрметті азаматы Аманкелді Кәрентаев өзінің «Шаруағұмыр», Елбасымен жеті рет жүздескен белгілі кәсіпкер Сауле Рысбаеваның Ұлы Отан соғысының 70 жылдығына орай шығарған «Мың тағзым» атты кітаптары кітапхана қорына сыйлады.

⠀

Шараға қатысушы зиялы қауым өкілдері ұрпаққа қалдырар ең үлкен мұра – кітап екендігін, өткеннің рухы, келешектің кілті, мәдениеттің биік шыңы да осы кітапта жатқандығын айтып, жастарды кітап оқуға, сол арқылы білімдерін жетілдіруге шақырды. Акцияға қатысушыларға «Балаларға базарлық!» көрмесі таныстырылып, кітапхананың тұрақты оқырмандары қонақтарға өлең мен әннен шашу шашты.

⠀

Қолдау көрсеткендеріңізге рахмет!