балалар мен жасөспірімдер кітапханасы

• Бір қарағанда бәрі өз орнында, қоғам өз арнасымен бірқалыпты дамып жатқандай. Дегенмен Ұлы дүниежүзілік дүбірлі көшке ілесу үшін ескіден арылып, жаңаға талғампаздықпен жанаса білу керек екендігімізді Елбасы Н.Назарбаев «Болашаққа бағдар: рухани жаңғыру» бағдарламалық мақаласы арқылы санамызға ғаламат ой салды.

 Бұл жерде біздің айтпағымыз – мақаланың әрбір тармағында байыпты бағдар, дәйекті даму жолдарының көрсетілгендігі. Мәселен, прагматизмге байланысты ойларын Ақтөбе және біздің облысымыздың ардагерлер қауымы орынды бастамалар көтеріп отыр. Тарқатып айтсақ, жуырда халықаралық Д.А.Қонаев атындағы қор бөлімшесінің ғимаратында өткен басқосуда белгілі ардагер ағамыз Н.Сейдуалиев жиын-тойларды былай қойғанда, бүгінгі күндегі қаралы үйдегі қазан мәселесі, яғни ас беру, жаназа таратудағы ысырапшылдық, даңғазалықты айта келе, осыны жалпыға ортақ жүйеге келтіру мәселесінің өзектілігін тілге тиек етті. Көптен кезегін күткен шаруа еді бұл. Орынды делік.

Сондай-ақ мақалада мәдени қазыналарымызды әлем жұртшылығына таныстырудың мүлдем жаңа тәсілдерін ойластыруымыз керек екендігімізді қаперге сала отырып, осынау әлемдік аренаға біздің заманауи мәдениетіміздің қандай өкілдерінің шығу керек екендігі туралы терең тоқталған.

Ықылым заманнан еларалық байланыстардың бастауы кітап десек те, бұл жерде барлық мүмкіндіктерімізді саралай келе, классикалық, эстрадалық, театр және кино, т.б. ұлттық өнерлерімізді ұлықтауға даңғыл жол ашып отырғаны анық. Бір сөзбен айтқанда, рухани жаңғыру дегеніміз осы. Бағдаршам бағдарлама дегеніміз де осы.

Гүлфайруз Инкербекова Жамбыл облыстық балалар мен жасөспірімдер кітапханасының директоры

Г. Инкарбекова Бағдаршам [Мәтін] / Г. Инкарбекова. // Жамбыл-Тараз.- 2017.- 31 мамыр (№22).- 08 б.